அனுதின வேததியானம்: உங்களுடைய முயற்சிகளே முக்கியம், பிரதிபலன்கள் அல்ல.

வேததியானக் குறிப்பு:  மத்தேயு 25:14-30 

நம்முடைய பள்ளி, சமூகம், மற்றும் குடும்பங்கள் நமக்கு என்ன கற்றுக் கொடுத்திருக்கின்றன என்று நீங்கள் எப்போதாவது சிந்தித்ததுண்டா? அவைகள் நமக்கு அர்ப்பணிப்புடன் இருக்கக் கற்றுக் கொடுத்திருக்கின்றனவா அல்லது எப்போதுமே குற்றமில்லாமல் செம்மையானவர்களாய் இருக்கக் கற்றுக் கொடுத்திருக்கின்றனவா? அவைகள் நம்மைக் கொள்கைகளுடனும் கோட்பாடுகளுடனும் வாழக் கற்றுக் கொடுத்திருக்கின்றனவா அல்லது வெற்றிகரமான வாழ்க்கை வாழக் கற்றுக் கொடுத்திருக்கின்றனவா? இந்தக் கேள்விகளை உன்னிப்பாகப் பாருங்கள். நான் பயன்படுத்தி இருக்கும் வார்த்தைகளில் மிக பெரிய வித்தியாசம் இருக்கிறது. அர்ப்பணிப்புடன் இருப்பது செம்மையாக இருப்பதை விட மிகவும் வித்தியாசமானது. நாம் கொள்கையுள்ளவர்களாக இருப்பதும் வெற்றியுள்ளவர்களாக இருப்பதும் ஒன்றல்ல. இப்போது, ​​இவற்றில் உண்மையில் நீங்கள் எதை விரும்புகிறீர்கள் என்று உங்களை நீங்களே கேட்டுக்கொள்ளுங்கள். நீங்கள் உங்களுடைய அர்ப்பணிப்பு மற்றும் கொள்கைகளை முதன்மைப் படுத்துகிறீர்களா அல்லது உங்களுடைய வெற்றி மற்றும் குற்றமில்லாத செம்மையான வாழ்வை விரும்புகிறீர்களா? உங்களில் பெரும்பாலோர்க்கு உங்களுடைய பதில் தெளிவாக இருக்கும் என்று நான் நம்புகிறேன். இப்போது, ​​உங்களை நீங்களே, “இதை குறித்து வேதம் என்ன அறிவுறுத்துகிறது?” என்று கேட்டுக்கொள்ளுங்கள். அப்போது அதற்கான பதில் தெளிவாக இருக்கும். 1 சாமுவேல் 16:7 “கர்த்தர் சாமுவேலை நோக்கி: நீ இவனுடைய முகத்தையும், இவனுடைய சரீரவளர்ச்சியையும் பார்க்கவேண்டாம்; நான் இவனைப் புறக்கணித்தேன்; மனுஷன் பார்க்கிறபடி நான் பாரேன்; மனுஷன் முகத்தைப் பார்ப்பான்; கர்த்தரோ இருதயத்தைப் பார்க்கிறார் என்றார்.”  

மத்தேயு 25:14-30-ல் உள்ள தாலந்துகளின் உவமையைக் கவனித்துப் பாருங்கள். இரண்டு மனிதர்கள் தங்களிடம் இருந்த தாலந்துகளை கொண்டு வியாபாரம்பண்ணி சம்பாதித்தார்கள். ஒருவனோ, ஒன்றும் செய்யாமல் சும்மா இருந்தான். 27-வது வசனத்தைக் கவனியுங்கள். மூன்றாவது மனிதனை, தன்னுடைய தாலந்துகளை அவன் வியாபாரம் பண்ணாமல் இருந்ததற்காகவோ அல்லது வர்த்திக்காமல் இருந்ததற்காகவோ எஜமான் கண்டிக்கவில்லை. அந்த மனிதன் குறைந்தபட்சம் அதை காசுக்காரர் வசத்திலாவது போட்டு வைத்திருந்திருக்க வேண்டும் என்று அவர் கூறுகிறார். அதில் வந்த லாபத்தைக் குறித்து அவர் பேசவில்லை, மாறாக, அந்தத் தாலந்தைக் கொண்டு அந்த மனிதன் எதையும் செய்ய ஆர்வமில்லாதிருக்கிறான் என்பதையே குறிப்பிடுகிறார். இதை வேறு விதமாக சொல்ல வேண்டுமானால், அந்த மனிதன் எந்த முயற்சிகளும் எடுக்காமல் தன்னை ஒரு பாதுகாப்பான நிலைமையில் வைத்துக் கொள்ள வேண்டுமென்று நினைத்ததை குறித்தே அவர் கோபப்படுகிறார். அவன் ஈட்டிய பணத்தின் அளவை விட, அவனுடைய தவறான மனப்பான்மையையும் அணுகுமுறையையும் தேவன் கண்டிக்கிறார். நாம் சற்று நேரமெடுத்து இதை நம்மை நாமே கேட்டுக்கொள்வோம் – பெரும்பாலும், நாம் சரியான காரியத்தை செய்கிறோமா, அல்லது பிரச்சினைகளைத் தவிர்க்க முயற்சித்து மூன்றாவது மனிதனைப் போல குற்றமற்றவர்களாக இருக்க முயற்சிக்கிறோமா? நம்முடைய கவனம் நம்முடைய மனப்பான்மையின் மேல் இருக்கிறதா அல்லது நம்முடைய செயல்திறனின் மேல் இருக்கிறதா? 2 கொரிந்தியர் 8:12 “ஒருவனுக்கு மனவிருப்பமிருந்தால், அவனுக்கு இல்லாததின்படியல்ல, அவனுக்கு உள்ளதின்படியே அங்கிகரிக்கப்படும்.”

      வேதாகமத்தில் எங்கும் தேவன் குற்றமில்லாமல் செவ்வையாய் இருப்பதையும் மற்றும் வெற்றியையும் அறிவுறுத்தவில்லை. அவர், தேவனுடைய கொள்கைகளுக்கும் கோட்பாடுகளுக்கும் நம்முடைய அர்ப்பணிப்பை மட்டுமே பரிந்துரைக்கிறார். அவர் நம்முடைய குற்றமற்ற செவ்வையான செயல்களை அல்லாமல் நம்முடைய இருதயத்தையே விரும்புகிறார். கொலோசெயர் 3:23,24 “நீங்கள் கர்த்தராகிய கிறிஸ்துவைச் சேவிக்கிறதினாலே, சுதந்தரமாகிய பலனைக் கர்த்தராலே பெறுவீர்களென்று அறிந்து, எதைச் செய்தாலும், அதை மனுஷர்களுக்கென்று செய்யாமல், கர்த்தருக்கென்றே மனப்பூர்வமாய்ச் செய்யுங்கள்”. பூரணமான உதாரணமான இயேசு கிறிஸ்துவை இப்போது நாம் பார்க்கலாம். இந்த பூமியில் அவருடைய முடிவு தோல்வியானதாகவே இருந்தது. அவர், நீண்ட காலம் வாழவில்லை, அவர் ஒரு துரோகியாகவும் தேவ தூஷணம் செய்பவராகவும் ஜனங்கள் எல்லார் மத்தியில் சிலுவையில் அறையப்பட்டார். அவர் கைவிடப்பட்டார், மற்றும், அவமதிக்கப்பட்டு சபிக்கப்பட்டார். இருப்பினும், அவருடைய மரணம் வரையில் சத்தியத்திற்காக தனது இருதயத்திலிருந்தும் ஆத்துமாவிலிருந்தும் உழைத்தார். அவர் ஜனங்களுடைய கருத்துக்களில் கவனம் செலுத்தவில்லை, மாறாக, நன்மை செய்வதற்கான அவருடைய அர்ப்பணிப்பின் மீதே கவனம் செலுத்தினார். ஆனால், நாம், இதற்கு நேர் மாறாக செயல்படுகிறோம் அல்லவா?

நாம் அநேக நேரம் குற்றமற்று செம்மையாய் இருப்பதிலும் காரியங்களை செய்யக்கூடிய செயல் திறனிலும் பெலனிலும் நம்முடைய கவனத்தை செலுத்தி தோல்வி அடைகிறோம். ஏனென்றால், இந்த உலகத்தில் இருக்கும் ஒவ்வொரு காரியத்திலும் மனிதனை அல்லாமல் நாம் தேவனையே சேவிக்கிறோம் என்பதை மறந்து விடுகிறோம். நாம் ஒரு நல்ல கிறிஸ்தவராக, பெற்றோராக, பிள்ளையாக, அல்லது வேலைக்காரராக இருப்பது என்றால் எப்போதுமே மிகச் சிறந்த விளைவுகளையும் பிரதிபலன்களையும் கொடுப்பதே என்று நினைக்கிறோம். ஆனால், அது இதற்கு மாறானது. நாம் எந்த இருதயத்துடன் காரியங்களை செய்கிறோம் என்பதே தேவனுக்கு முக்கியமானது. நம்முடைய செயல்பாடுகளின் அடிப்படையானது அவரை வேர் கொண்டு இருக்குமானால் நம்முடைய பலவீனங்களின் மேல் அவர் எஜமானாய் இருப்பார். முயற்சிகளும் அர்ப்பணிப்பும் நம்முடைய வேலைகள். விளைவுகளை உருவாக்குவது அவருடைய வேலை. இயேசுவினுடைய அர்ப்பணிப்பு உலகத்திற்கு அடுத்த பரிமாணங்களை அல்லாமல் நித்திய பரிமாணங்களை உருவாக்கியது. பிரசங்கி 9:10 செய்யும்படி உன் கைக்கு நேரிடுகிறது எதுவோ, அதை உன் பெலத்தோடே செய்; நீ போகிற பாதாளத்திலே செய்கையும் வித்தையும் அறிவும் ஞானமும் இல்லையே. 

இன்றைய சிந்தனைக்கு:

தேவனுடைய பார்வையில் மெய்யாகவே எது மதிப்பிடப்படுகிறது – என்னுடைய குணாதிசயமா அல்லது செயல்திறனா? நான் என்னுடைய முழு இருதயத்தின் முயற்சிகளில் மகிழ்ச்சி கொள்கிறேனா அல்லது என்னுடைய மிக செம்மையான செயல்களில் மகிழ்ச்சி கொள்கிறேனா? என்னை திருப்தி படுத்துவது எது – சரியானதை செய்வதா அல்லது நற்பெயரை சம்பாதிப்பதா? நான் இயேசு கிறிஸ்துவை சேவிக்கின்றேனா அல்லது என்னுடைய புகழை சேவிக்கின்றேனா?

ஜெபம்:

பரலோகத்தில் இருக்கும் எங்கள் பிதாவே, நாங்கள் பெரும்பாலும் எங்களுடைய குற்றமற்ற செம்மையிலும், வெற்றிகளிலும் நோக்கமாய் இருக்கிறோம். நாங்கள் எப்பொழுதும் சரியானவர்களாக இருக்க வேண்டும் என்று விரும்புகிறோம். நாங்கள் எப்போதும் எங்களுடன் வேலை செய்கிறவர்கள், முதலாளிகள், சக விசுவாசிகள், மற்றும் குடும்ப அங்கத்தினர்களின் அங்கீகரிப்பையும் மதிப்பையும் எதிர்பார்க்கிறோம். நீர் எங்களை எங்களுடைய ஆத்துமாவில் இருந்து உமக்கென்று மனப்பூர்வமாக காரியங்களை செய்ய வேண்டும் என்று விரும்புகிறீர் என்பதை மறந்து விட்டோம். எல்லா தீர்க்கதரிசிகளும், நியாயாதிபதிகளும், உம்முடைய சீஷர்களும் பலவீனங்களை கொண்டிருந்தார்கள் என்பதை நினைவு கூற எங்களுக்கு உதவி செய்யும். எவருமே குறைபாடற்று செவ்வையானவர்களாய் இருக்கவில்லை. நீர் அவர்களுடைய செவ்வையற்ற நிலைமையை கண்டிக்கவில்லை. அவர்களுடைய கடின இருதயத்தைக் கண்டித்து, அவர்களுடைய மனம் திரும்புதலை கனம் பண்ணினீர். இன்று, எங்களுடைய பலவீனங்களை நாங்கள் ஏற்றுக் கொண்டு எங்களுடைய செம்மையான பிரதிபலிப்புகளின் மேல் அல்லாமல் எங்களுடைய அர்ப்பணிப்பின் மேல் நாங்கள் கவனம் செலுத்த எங்களுடைய இருதயங்களை நீர் சதையானதாய் மாற்ற விண்ணப்பம் செய்கிறோம். எப்படிப்பட்டதான பிரதிபலிப்புகள் நேரிட்டாலும் நாங்கள் நன்மையானதையே செய்ய நோக்கமாய் இருக்க எங்களுக்கு உதவி செய்யும். எங்களுடைய பலவீனங்களின் மேல் நாங்கள் நோக்கம் வைக்கும் போது, நாங்கள் குற்றமில்லாதவர்களாய் இருக்க வேண்டும் என்று நீர் எங்களை கேட்டுக் கொள்ளாமல் நாங்கள் உம்மோடு மாத்திரம் இருக்க வேண்டும் என்று விரும்புகிறீர் என்பதை புரிந்து கொள்ள உதவி செய்யும். எங்களுடைய தேவனும் இரட்சகருமாகிய இயேசு கிறிஸ்துவின் இணையற்ற நாமத்தின் மூலம் இதை கேட்டுக்கொள்கிறோம், ஆமென்.

இன்றைக்கு கற்றுக்கொள்ள வேண்டியது:   

      I கொரிந்தியர் 3: 6,7 நான் நட்டேன், அப்பொல்லோ நீர்ப்பாய்ச்சினான், தேவனே விளையச்செய்தார். அப்படியிருக்க, நடுகிறவனாலும் ஒன்றுமில்லை, நீர்ப்பாய்ச்சுகிறவனாலும் ஒன்றுமில்லை, விளையச்செய்கிற தேவனாலே எல்லாமாகும். குறைபாடு இல்லாமல் செவ்வையாய் இருப்பது என்பது நாம் எப்போதுமே தோல்வி அடைந்து, அடையவே முடியாத ஒரு இலக்கை நோக்கி முயற்சி செய்து கொண்டிருப்பதற்கே பிசாசினால் உட்படுத்தப்பட்ட ஒரு அளவுகோல் ஆகும். நாம் தேவனுடன் சேர்ந்து இயங்குகிறோமா அல்லது குற்றமில்லாமல் செவ்வையாய் இருப்பதற்காக இயங்குகிறோமா என்பதை மட்டுமே தேவன் எப்போதும் ஆராய்ந்து பார்க்கிறார். நாம் அவருடன் சேர்ந்து இயங்கும் போது செவ்வையாய் இருக்க வேண்டும் என்ற பாரம் நம்முடையது அல்ல. நாம் சவால்களையும் கடினங்களையும் சந்திக்கும் போது, மற்றவர்கள் நம்மை எப்படி பார்த்து மதிப்பிடுகிறார்கள் என்பதை குறித்து கவலைப்படாமல், நாம் நம்முடைய குணாதிசயத்தை இந்த செயல்பாட்டின் மூலம் வளர்த்துக் கொள்ளுவதிலும் தேவனுக்கு முன்பாக உண்மையாய் இருப்பதில் மட்டுமே கவனம் செலுத்துவோமானால், பெரும்பாலான பாரம் நம் மேல் இருந்து எடுக்கப்படும். எந்த சூழ்நிலையிலும் நாம் எத்தகைய பிரதிபலன்களை உற்பத்தி செய்கிறோம் என்று அல்லாமல் நம்முடைய குணாதிசயம் மட்டுமே மதிப்பிடப்படுகிறது. நாம் நம்முடைய கரங்களில் இருந்து மனுஷர்களுக்கென்று அல்லாமல், நம்முடைய ஆத்துமாவிலிருந்து மனப்பூர்வமாக தேவனுக்கென்று வேலை செய்யும் பழக்கத்திற்குள் வரவேண்டும். நமக்கு இருக்கும் எல்லாவற்றையும் கொண்டு நமக்கு முடிந்த அளவு சிறந்தவைகளை கொடுக்கிறோமோ? நாம் எல்லா நேரங்களிலும் மனப்பூர்வமாகவும், உண்மையாகவும், முழு அர்ப்பணிப்புடனும் இருக்கிறோமா? இதன் அடிப்படையிலேயே தேவன் நம்மை நியாயம் தீர்க்கிறார். இவைகளில் மட்டும் நாம் நம்முடைய கவனத்தை செலுத்துவோமானால் அவர் மற்றவைகளை பார்த்துக் கொள்வார்.

(2025 நவம்பர் மாதம் 29 அன்று மத்தேயு 11:28 ஊழியத்தின் சார்பாக சகோதரி ஜெசிந்த் ஏஞ்சல் அவர்கள் எழுதிய தினசரி வேத தியானத்தின் பிரதிபலிப்பு சகோதரி ஜெசிந்த் ஏஞ்சல் மற்றும் சகோதரி லல்லியால் மொழிப்பெயர்க்ப்பட்டது).

அறிவிப்புகள்:

1. உங்களுடைய சீஷத்துவ பயணத்தில் நீங்கள் ஆதரவைத் தேடுகிறீர்கள் என்றால், ஒவ்வொரு சனிக்கிழமையும் காலை 6 மணிக்கு (இந்திய நேரப்படி) நடைபெறும் எங்களுடைய வாராந்திர சீஷத்துவ கூடுகையில் சேர உங்களை அன்புடன் அழைக்கிறோம்.

இணைப்பு:https://us06web.zoom.us/j/81144235750pwd=RG4veEdLQkJNS1NxYW1ZWmNnb3EvQT09  (சந்திப்பு ஐடி (Meeting ID) : 811 4423 5750.  கடவுச்சொல் (Password): 12345). 

2. தனிப்பட்ட ஆலோசனை பெறுவதற்கு எங்களைத் தொடர்புகொள்ளவும். உங்களுடன்    விசுவாசத்திலும்  மற்றும்  ஐக்கியத்திலும்  நடக்க நாங்கள் எதிர்நோக்குகிறோம். 

• எங்களுடைய    ஊழியங்கள்    மற்றும்      கூடுகைகளை குறித்த  அறிவிப்புகளுக்கும்  மற்றும் தகவல் தொடர்புக்கும்  எங்கள் வாட்ஸ்அப் குழுவில் சேரவும்: https://chatwhatsapp.com/FQuH58GtkEEApPCm9gN8no 

• நேரடி ஆலோசனை பெற்றுக்கொள்ளநீங்கள் விரும்பினால்,கீழேஉள்ள  இணைப்பை  உபயோகித்து   ஏற்பாடு செய்யுங்கள். https://scheduler.zoom.us/rev-immanuel-paul-appointment.

அனுதின வேததியானம்: நினைவு கூறுகிற தேவன் 

வேத தியானக் குறிப்பு: உபாகமம் 31:6

வேதாகமம், அநேக நேரம், “தேவன் நினைவுக்கூர்ந்தார்” என்ற சொற்றொடரை உபயோகிப்பதை நாம் பார்க்கலாம். எல்லையற்ற ஜலப்பிரளயத்தில் நோவா மிதந்து கொண்டிருந்ததை தேவன் நினைவுக்கூர்ந்தார். இஸ்ரவேல், எகிப்தில் இருந்து கூக்குரலிட்டதை அவர் நினைவுக்கூர்ந்தார். நீண்ட காலமாக ஒரு குழந்தைக்கான ஏக்கத்தில் இருந்த ராகேலை அவர் நினைவுக்கூர்ந்தார். முதல் கண்ணோட்டத்தில், “நினைவுக்கூர்ந்தார்” என்பது தேவன் சில காலம் மறந்து இருந்திருக்கலாம் என்பதைப் போல தோன்றுகிறது. ஆனால், வேதாகமம், தேவன் “நினைவுக்கூர்ந்தார்” என்று சொல்லும் போது, அவர் தன்னுடைய மக்களை நோக்கி புதிய இரக்கத்துடனும் திட்டமான நடவடிக்கையோடும் கடந்து சென்றதைக் குறிக்கிறது. அது, “இனி, நான் உள்ளே நுழைகிறேன்.” என்று அவர் சொல்லுவதாக இருந்தது.

முக்கியமானவைகள் எவைகளோ அவைகளை மறந்து விடக்கூடாது என்ற முயற்சியில் நாம் அதிக ஆற்றலை செலுத்துகிறோம். ஆனால், முக்கியமானவைகளைப் பற்றிக் கொண்டு மற்றவைகளை கடந்து போக விடுவதற்கு நமக்கு உதவி செய்ய பரிசுத்த ஆவியானவர் ஒரு வழியை வைத்திருக்கிறார். நம்மை ஆழமாய் பாதித்த நம்முடைய பழைய காயங்கள், சட்ட ரீதியான குரல்கள், மற்றும் ஞாபகங்கள் மேல் நமக்கு இருக்கும் பிடியை அவர் தளர்த்துகிறார். சில நேரங்களில், நம்முடைய கடந்த கால துன்பங்களை பற்றி நமக்கு ஞாபக மறதி இருப்பதைப் போல் தோன்றலாம். ஆனால், இந்த ஞாபக மறதியும் ஒரு அமைதியான குணப்படுத்துதலின் ஈவாக மாறுகிறது.

ஆனால், தேவன் மறப்பாரோ? ஒரு பரிசுத்த ரீதியில், ஆம், அவர், நம்முடைய பாவங்களை “மறக்கிறார்.” அதாவது, நம்முடைய பாவங்களை பற்றி அவருக்கு இருக்கும் அறிந்து கொள்ளுதலை அவர் அழிக்க மாட்டார், ஆனால், நாம் செய்ததற்கு ஏற்றவாறு நம்மை கையாளாமல் இருக்கத் தெரிந்து கொள்வதின் நிமித்தம் அதை செய்கிறார். அவருடைய மறதி, நமக்கு கொடுக்கபடும் கிருபையாகும், அவருடைய குறைபாடு அல்ல.

ஆனால், மறுபுறமாக, நிவாரணமே இல்லாமல் அக்கினியாய் தோன்றும் சில காலங்களும் இருக்கின்றன. ஏசாயா, தேவனை, வெள்ளியையும் பொன்னையும் புடமிடுகிறவர் என்று வரையறுக்கிறார். அந்த அக்கினியில் நம்மை சுற்றி எதுவுமே மாறாதது போல் தோன்றுகிறது. அந்த அழுத்தம் நிலை நிற்கிறது. அந்த அக்கினி நிலை நிற்கிறது. வாழ்க்கை ஒரு இடத்தில் சிக்கிக் கொண்டதைப் போல் தெரிகிறது. அந்த தருணத்தில் தான் அநேக நேரம் தேவன் அங்கிருந்து வெளியேறி இருப்பதைப் போல் தோன்றுகிறது. ஆனால், புடமிடுகிற ஒருவர், உலோகத்தை எப்போதுமே கவனிக்காமல் விட மாட்டார். தன்னுடைய கண்களை அதின் மேல் நோக்கமாய் வைத்து தன்னுடைய சொந்த ரூபத்தை அதில் காணும் நேரம் வரைக்கும் காத்திருக்கிறார்.

இதுதான் “பலங்கொண்டு திடமனதாயிருங்கள், அவர்களுக்குப் பயப்படவும் திகைக்கவும் வேண்டாம்; உன் தேவனாகிய கர்த்தர்தாமே உன்னோடேகூட வருகிறார்; அவர் உன்னை விட்டு விலகுவதும் இல்லை; உன்னைக் கைவிடுவதும் இல்லை” என்று உபாகமத்தில் இருக்கும் வாக்குத்தத்திற்க்கு பின்னாக இருக்கும் அர்த்தமாகும். இது, தேவனின் கவனம், ஒரு நிமிடத்திற்கு கூட சிதறவில்லை என்பதற்கான நினைவூட்டுதல் ஆகும். அவருடைய பிரசன்னம் அமைதியாக தோன்றினாலும் அது நிலையானதாகவும் அசையாததாகவும் இருக்கிறது. அவர் நம்மை வனைந்து கொண்டும் மெருகேற்றிக் கொண்டும் இருக்கிறார். பின்பு, உங்களுடைய வாழ்க்கையில் இருந்து அவருடைய குணாதிசயம் பிரகாசிக்கும் போது, தன்னுடைய சுத்திகரிப்பு அதன் வேலையை செய்து முடித்திருக்கிறது என்று அறிகிறார். அதன் பிறகு, அந்த அக்கினியில் இருந்து அவர் உங்களை தூக்கி எடுத்து அவருடைய மகிமைக்கு ஏதுவான ஒன்றாக உங்களை உருவாக்குகிறார். இப்போது அந்த அக்கினி கடுமையானதாக தோன்றினால் நீங்கள் கைவிடப்பட்டிருக்கிறீர்கள் என்று நினைத்துக் கொள்ளாதீர்கள். அக்கினி என்பது நிராகரிப்பு அல்ல. அது, மறுரூபப்படுத்துவது. மற்றும், உங்கள் மேல் கண்ணோக்கமாய் இருக்கிறவர் இன்றும் உங்களை நினைவு கூறுகிறார்.

இன்றைய சிந்தனைக்கு:

தேவனுடைய அமைதி, அவர் இல்லாதிருக்கிறார் என்பது அல்ல. ஆனால், அது அக்கினியை விட்டு எப்போதுமே விலகாமல் இருக்கும் புடமிடுகிறவரின் நிலையான கண்காணிப்பு ஆகும். இன்று, நீங்கள் காணப்பட்டும், நினைவு கூறப்பட்டும், தாங்கப்பட்டும் இருக்கிறீர்கள் என்ற வாக்குத்தத்தில் இளைப்பாருங்கள். அவர், உங்களில் தொடங்கிய வேலையானது இன்னும் ஒரு நோக்கத்துடன் வெளிப்பட்டுக் கொண்டிருக்கிறது என்பதை விசுவாசியுங்கள்.          

ஜெபம்:

           பரலோகத்தில் இருக்கும் எங்கள் பிதாவே, இயேசு கிறிஸ்துவின் நாமத்தினால் உமக்கு முன்பாக வருகிறோம். நாங்கள் காண்கிறதை வைத்து அல்லாமல் விசுவாசத்திலே நடக்க நீர் எங்களை அழைத்து இருந்தாலும், அநேக நேரம், எங்களுடைய கண்கள் உம்முடைய மகிமையையும் வல்லமையையும் பார்ப்பதில் குறைவுபட்டு, மாறாக, எங்களுடைய பலவீனங்களிலும், கடந்த கால காயங்களிலும், எங்களுடைய பயங்களிலும் நாங்கள் சார்ந்து இருந்திருக்கிறோம். ஒன்றும் இல்லாதவைகளில் இருந்து அனைத்தையும் உருவாக்குகிற தேவனாகிய கர்த்தர் நீரே என்பதை எங்களுக்கு மறுபடியுமாக கற்பித்தருளும். தேவனே, எங்களை நீர் ஆறுதல் செய்து உம்முடைய பலத்த கரத்தினால் எங்களை நிலை நிறுத்தும். இருளிலே நாங்கள் வெளிச்சமாய் பிரகாசிப்பதற்கு உம்முடைய குணப்படுத்துதல் எங்களுக்குள்ளாக கடந்து வருவதாக. இயேசு கிறிஸ்துவின் நாமத்தில் நாங்கள் ஜெபிக்கிறோம், ஆமென்.

இன்றைக்கு கற்றுக்கொள்ள வேண்டியது:

தேவன் “நினைவு கூறுகிறது” என்பது அவர் அதுவரை மறந்திருந்தார் என்றதால் அல்ல. மாறாக, அவர் நமக்கு நேராக இரக்கத்துடனும் நோக்கத்துடனும் ஒரு புதுப்பிக்கப்பட்ட செயல்பாட்டுடன் கடந்து வருவதை குறிக்கிறது. நம்முடைய வாழ்க்கையானது புடமிடும் அக்கினியைப் போல் தோன்றினாலும் தேவனுடைய பிரசன்னம் தொடர்ச்சியாய் நம்மை அவருடைய மகிமைக்காக வனைந்து பரிசுத்தப்படுத்துகிறதாய் இருக்கிறது. நமக்குள், ஞாபக மறதி என்பது சில நேரங்களில் நம்முடைய குணப்படுதலுக்காக தேவையானதாயும் இருக்கிறது. அது, நம்முடைய கடந்த கால வேதனைகளிலிருந்து நம்மை விடுவித்து குணப்படுத்துதல் நமக்குள் வேர் கொள்ளுவதற்கான ஒரு ஈவு. நாம் அநேக நேரம் அதை பார்க்காவிட்டாலும் தேவனுடைய கவனம் எப்போதுமே நம்மை விட்டு விலகுவதில்லை. அவருடைய அன்பு என்றைக்கும் குறையாததாயும் நம்மை கைவிடாததாயும் இருக்கிறது. இந்த அக்கினியானது நம்மை கைவிடுவதற்காக அல்லாமல் நம்மை மறுரூபப்படுத்துவதற்காகவே இருக்கிறது என்பதை நாம் அறிந்து கொண்டு இந்த செயல்பாட்டில் அவரை நம்பி இருப்பதற்காக  நாம் அழைக்கப்பட்டு இருக்கிறோம்.

(2025 நவம்பர் மாதம் 22 அன்று மத்தேயு 11:28 ஊழியத்தின் சார்பாக Rev. இம்மானுவேல் அருள் பால் அவர்கள் எழுதிய தினசரி வேத தியானத்தின் பிரதிபலிப்பு சகோதரி ஜெசிந்த் ஏஞ்சலால் மொழிப்பெயர்க்ப்பட்டது).

அறிவிப்புகள்:

1. உங்களுடைய சீஷத்துவ பயணத்தில் நீங்கள் ஆதரவைத் தேடுகிறீர்கள் என்றால், ஒவ்வொரு சனிக்கிழமையும் காலை 6 மணிக்கு (இந்திய நேரப்படி) நடைபெறும் எங்களுடைய வாராந்திர சீஷத்துவ கூடுகையில் சேர உங்களை அன்புடன் அழைக்கிறோம்.

இணைப்பு:https://us06web.zoom.us/j/81144235750pwd=RG4veEdLQkJNS1NxYW1ZWmNnb3EvQT09  (சந்திப்பு ஐடி (Meeting ID) : 811 4423 5750.  கடவுச்சொல் (Password): 12345). 

2. தனிப்பட்ட ஆலோசனை பெறுவதற்கு எங்களைத் தொடர்புகொள்ளவும்.உங்களுடன்    விசுவாசத்திலும்  மற்றும்  ஐக்கியத்திலும்  நடக்க நாங்கள் எதிர்நோக்குகிறோம். 

• எங்களுடைய ஊழியங்கள்    மற்றும்      கூடுகைகளை குறித்த  அறிவிப்புகளுக்கும்  மற்றும் தகவல் தொடர்புக்கும்  எங்கள் வாட்ஸ்அப் குழுவில் சேரவும்: https://chatwhatsapp.com/FQuH58GtkEEApPCm9gN8no

• நேரடி ஆலோசனை பெற்றுக்கொள்ளநீங்கள் விரும்பினால்,கீழேஉள்ள இணைப்பை  உபயோகித்து   ஏற்பாடு செய்யுங்கள். https://scheduler.zoom.us/rev-immanuel-paul-appointment.

அனுதின வேததியானம்: நோக்கங்கள் மட்டும் போதுமானதல்ல

வேத தியானக் குறிப்பு: 2 சாமுவேல் 6:6,7 

      இயேசு கிறிஸ்து, “நானே வழியும் சத்தியமும் ஜீவனுமாயிருக்கிறேன்; (யோவான் 14 : 6) என்று கூறினார். இது, கேட்பதற்கு எளிமையாகத் தோன்றினாலும், அதை நம்முடைய வாழ்வில் நடைமுறைப்படுத்துவது கடினம். நாம் அநேக நேரம் நம்முடைய நல்ல நோக்கங்கள் நல்ல முறையில் மதிப்பிடப்பட்டு கணக்கில் கொள்ளப்படும் என்று நினைக்க விரும்புகிறோம். அதாவது, நம்முடைய இருதயம் சரியான இடத்தில் இருக்குமானால், தேவன் நம்மை புரிந்து கொள்வார் என்று நினைக்கிறோம். ஆனால், வெறும் நம்முடைய நல்ல நோக்கங்கள் மட்டும் எப்பொழுதுமே நம்மை தேவனுடைய வழிகளோடு ஒத்துப் போக வைப்பதற்கு போதுமானது அல்ல என்று வேதாகமம் நமக்கு காட்டுகிறது. 

      2 சாமுவேல், 6 ஆம் அதிகாரத்தில் உள்ள ஊசாவை எடுத்துக் கொள்ளுங்கள். தேவனுடைய உடன்படிக்கையின் பெட்டி சுமந்து செல்லப்பட்டது, அந்த நிலையில் மாடுகள் தடுமாறின போது, ஊசா பெட்டியை நிலைநிறுத்த அவனுடைய கையை நீட்டினான். அது, தீங்கற்றதாகவும் மேலும் கனத்துக்குரிய ஒன்றாகவும் தெரிகிறது, இல்லையா? ஆனால், தேவன் அவனை அங்கேயே அடித்து விட்டார். ஊசா, தூன்மார்க்கானாக இருந்ததால் அல்ல, ஆனால், அவன் தேவனுடைய கட்டளைக்கு புறம்பாகச் செயல்பட்டதால் தேவன் அவனை அடித்தார். அவனுடைய இருதயம் நல்லதையே நோக்கமாகக் கொண்டிருந்தாலும், அவனுடைய கைகள் தேவனுடைய வழியை விட முந்திச் சென்று செயல்பட்டன.   

    இந்த சம்பவம் என்னை கொஞ்சம் உலுக்கியது. அது, தேவனுடைய வார்த்தையைவிட நம்முடைய உணர்வுகளை நம்புவது எவ்வளவு எளிதானது என்பதை நினைவூட்டுகிறது. இதை தான் பிசாசு விரும்புகிறான். அவன், நாம் “உண்மையில் சரியானது” மீது நம்பிக்கை வைப்பதை விட “சரி என்று தோன்றுவது” மீது நம்பிக்கை வைப்பதையே விரும்புகிறான். ஆனால், வேதாகமம் கூறுவது போல, நம்முடைய இருதயம் ஏற்கனவே பாவத்தினால் தீட்டுப்பட்டு இருக்கிறது. எனவே, நாம் எவ்வளவு உண்மையாக இருந்தாலும், உடைந்து போன இருதயத்திலிருந்து பிறக்கும் எதுவும் தேவன் எதிர்பார்க்கும் பரிசுத்தத்தை உருவாக்க முடியாது. 

     அதனால் தான்  இயேசு கிறிஸ்து நமக்கு தேவையானவராய் இருக்கிறார். நம்முடைய நோக்கங்கள் நம்மைக் இரட்சிக்க முடியாது. அவருடைய இரத்தம் மட்டுமே நம்மை இரட்சிக்க முடியும். நம்மால் சரி செய்ய முடியாத நம்முடைய குழப்பங்களில் அவரே உள்ளே நுழைந்து நாம் முன்பாக செல்லக்கூடிய புதிய வழியை உருவாக்குகிறார். ஏசாயா 45:2 –ல் தேவன் இப்படியாக வாக்குத்தத்தம் செய்கிறார், “நான் உனக்கு முன்னே போய் கோணலானவைகளைச் செவ்வையாக்குவேன்; வெண்கலக் கதவுகளை உடைத்து, இரும்புத் தாழ்ப்பாள்களை முறித்து”. இது, அவர், “நான் உன்னை வழிநடத்துகிறேன், நீ என்னை பின்பற்று” என்று சொல்லும் அவருடைய குரலாகும். 

        எனவே, உங்களுடைய நல்ல நோக்கங்கள் உங்களுடைய சாக்கு போக்காக மாற விடாதீர்கள். மாறாக, இயேசு கிறிஸ்துவின் மீது உங்கள் கண்களை வைத்திருங்கள்.  அவருடைய வழிகள் நமக்கு இயல்பாகத் தோன்றும் காரியங்களை ஊடுருவி வெட்டி சென்று அதற்கு மாறியதாய் தோன்றினாலும் அவைகளை பின்பற்றுங்கள். உண்மையான மகிழச்சி அங்குதான் தொடங்குகிறது. அது, சரியாகச் செய்வதன் மூலம் வரும் தற்காலிகமான மகிழ்ச்சி அல்லமால் இரட்சிப்பின் மூலம் வரும் ஆழமான நிலைத்திருக்கக்கூடிய மகிழ்ச்சியே ஆகும். 

இன்றைய சிந்தனைக்கு

     என்னுடைய நோக்கங்கள் இயேசு கிறிஸ்துவின் வார்த்தையினாலும் ஆவியினாலும் வழிநடத்தப்படுகின்றதா? என்னுடைய செயல்கள் என் சொந்த பகுத்தறிவிலிருந்து வராமல் அவருடைய சத்தியத்திலிருந்து வருகிறதா?  நான் ஒரு விஷயத்தை சரியாய் செய்வதில் திருப்தியடைகிறேனா அல்லது என்னை அவரிடம் அர்ப்பணித்து அவருக்காகக் காத்திருப்பதில் திருப்தி அடைகிறேனா? 

ஜெபம் 

      பரலோகத்தில் இருக்கும் எங்கள் பிதாவே, இயேசு கிறிஸ்துவின் நாமத்தினாலே உம்முடைய இரக்கத்திர்க்காக உம்முடைய கிருபையின் சிங்காசனத்திற்கு முன்பாக வருகிறேன். என்னுடைய சொந்த நோக்கங்களை விட உம்முடைய வழியை முதன்மை படுத்துவதற்கு எனக்கு உதவி செய்யும். நான் உம்முடைய குணாதிசயத்தை பிரதிபலிப்பதன் மூலம் என்னுடைய வாழ்க்கையின் மூலமாக உம்முடைய நாமம் மட்டுமே மகிமைப்படுவதாக. தேவனே, உம்மை பிரியப்படுத்துவதற்கு என்னுடைய விருப்பங்கள் மட்டும் போதுமானவை அல்ல என்பதை நான் அரிந்திருக்கிறேன். ஒவ்வொரு நாளும் கிறிஸ்துவின் வழியைத் தேடவும், என்னுடைய நோக்கங்களை ஒரு காரணமாகப் பயன்படுத்தாமல் இருக்கவும் எனக்கு கிருபை செய்வீராக. குயவனின் கையில் களிமண்ணைப் போல நான் என்னை உம்மிடத்தில் கீழ்ப்படுத்துகிறேன். இயேசு கிறிஸ்துவின் நாமத்தில் ஜெபிக்கிறேன், ஆமென். 

இன்றைக்கு கற்றுக்கொள்ள வேண்டியது

நம்முடைய புரிந்து கொள்ளுதலிலும் அறிவிலும் இருந்து வரும் நம்முடைய மிக சிறந்த நோக்கங்களும் தேவனுடைய இருதயத்திலிருந்து தவறி இருக்க முடியும். நன்மையானதை மனதில் கொண்டு செயல்படுவதும் கீழ்படிதலில் நடப்பதும் ஒன்று அல்ல என்பதை ஊசியாவின் சம்பவம் நமக்கு நினைவூட்டுகிறது. இயேசு கிறிஸ்து, நம்முடைய நல்ல நோக்கங்களினால் மட்டும் அல்லாமல் நம்முடைய ஒவ்வொரு படிகளும் அவரிடத்தில் சரணடைக்கப்பட்டதாய் இருந்து அவருடைய வழிகளை பின்பற்ற நம்மை அழைக்கிறார்.

(2025 நவம்பர் மாதம் 15 அன்று மத்தேயு 11:28 ஊழியத்தின் சார்பாக Rev. இம்மானுவேல் அருள் பால் அவர்கள் எழுதிய தினசரி வேத தியானத்தின் பிரதிபலிப்பு சகோதரி லல்லியால் மொழிப்பெயர்க்ப்பட்டது) 

அறிவிப்புகள்: 

1. உங்களுடைய சீஷத்துவ பயணத்தில் நீங்கள் ஆதரவைத் தேடுகிறீர்கள் என்றால், ஒவ்வொரு சனிக்கிழமையும் காலை 6 மணிக்கு (இந்திய நேரப்படி) நடைபெறும் எங்களுடைய வாராந்திர சீஷத்துவ கூடுகையில் சேர உங்களை அன்புடன் அழைக்கிறோம்.

இணைப்பு:https://us06web.zoom.us/j/81144235750pwd=RG4veEdLQkJNS1NxYW1ZWmNnb3EvQT09  (சந்திப்பு ஐடி (Meeting ID) : 811 4423 5750.  கடவுச்சொல் (Password): 12345). 

2. தனிப்பட்ட ஆலோசனை பெறுவதற்கு எங்களைத் தொடர்பு கொள்ளவும்.  உங்களுடன்    விசுவாசத்திலும்  மற்றும்  ஐக்கியத்திலும்  நடக்க நாங்கள் எதிர்நோக்குகிறோம். 

• எங்களுடைய ஊழியங்கள்  மற்றும்  கூடுகைகளை குறித்த  அறிவிப்புகளுக்கும்    மற்றும் தகவல் தொடர்புக்கும்  எங்கள் வாட்ஸ்அப் குழுவில் சேரவும்:  https://chatwhatsapp.com/FQuH58GtkEEApPCm9gN8no

• நேரடி ஆலோசனை பெற்றுக்கொள்ள நீங்கள் விரும்பினால், கீழே உள்ள  இணைப்பு உபயோகித்து ஏற்பாடு செய்யுங்கள்.                    https://scheduler.zoom.us/rev-immanuel-paul-appointment.

Click Here to Download as PDF-> Tamil

அனுதின வேததியானம் :உங்கள் கொள்கைகளைக் குறித்து எச்சரிக்கையாக இருங்கள்

இன்றைய வேததியான குறிப்பு: பிலிப்பியர் 2-5.

“உண்மையாகவே, என் வாழ்க்கையை ஆளுகை செய்து வழிநடத்துவது எது? என் சிந்தனைகள், என்னுடைய உணர்ச்சியின் வெளிப்பாடுகள் மற்றும் முடிவுகளை ஒவ்வொரு நாளும் வடிவமைப்பது எது?” என்று உங்களை ளை நீங்களே கேட்டுக்கொண்டதுண்டா? நாம் நம்முடைய வெளிப்புற தோற்றத்தில் மட்டுமல்லாமல் நம்முடைய உள்ளான இயல்பிலும் தேவனுடைய சாயலில் உருவாக்கப்பட்டு இருக்கிறோம் என்று வேதாகமம் சொல்லுகிறது. அவருடைய இயல்பு, மகிமை, அன்பு. சத்தியம், மற்றும் நீதி ஆகியவை நம்மூலமாக பிரகாசிக்க வேண்டும் என அவரால் திட்டமிடப்பட்டிருந்தது. ஆனால், இந்த மனுகுலம் பாவம் செய்தபோது நாம் அந்த மகிமையை இழந்தோம். ஆனாலும், தேவன் நம்மை அப்படியே விட்டுவிடவில்லை. அவருடைய மகத்தான அன்பினால், இழந்ததை மீட்டெடுக்கவும், அவருடன் நம்மை மீண்டும் இணைக்கவும் அவர் தம்முடைய குமாரனாகிய இயேசு கிறிஸ்துவை அனுப்பினார். கிறிஸ்தவத்தின் உண்மையான நோக்கம். நாம் ஒழுக்க நெறிமுறைகளோடு வாழ்வதோ அல்லது தேவலாயத்திற்குச் சொல்வதோ மட்டுமல்ல அது, தேவனுடன் ஐக்கியமாக இருப்பதைப் பற்றியது. அதாவது, அவருடைய சுவாபமும் கொள்கைகளும் கோட்பாடுகளும் நமக்குள்ளாக நிலைத்து நிற்கும் வரை நாம் மறுரூபமாகப்படுவதையே குறிக்கிறது. இப்படி இருக்க, நாம் அவரோடு இணைய வேண்டும் என்று விரும்பும் தேவன் யார்? இதை வேதாகமம் தெளிவாகக் வரையிட்டு காட்டுகிறது: தேவன் அன்பாகவே இருக்கிறார். அவரே சத்தியம். அவர், சந்தோஷம், சமாதானம், நீடியபொறுமை, தயவு, நற்குணம், விசுவாசம், சாந்தம் இச்சையடக்கம் உள்ளவர். அவர், நியாயமாகவும் இரக்கமாகவும் இருக்கிறார். அவர் நீதி மற்றும் கொள்கைகளும் நெறிமுறைகளும் நிறைந்தவராய் இருக்கிறார். எனவே, அவர் தம்முடைய கொள்கைகளின்படி செயல்படுவதால், அவருடைய கொள்கைகள் நம்முடைய இருதயங்களில் எழுதப்படாவிட்டால் மெய்யாகவே நாம் அவருக்குச் சொந்தமானவர்கள் என்று சொல்ல முடியாது. இதனால் தான் பிலிப்பியர் 2:5 நம்மை இவ்வாறு வலியுறுத்திகிறது. “கிறிஸ்து இயேசுவிலிருந்த சிந்தையே உங்களிலும் இருக்கக்கடவது.” இதைப்பற்றி நன்றாக சிந்தித்து பாருங்கள். தேவன் நாம் சில விதிகளைப் பின்பற்றுவதை மட்டும் விரும்பவில்லை. நாம் கிறிஸ்துவைப் போல சிந்திக்கவும், உணரவும். செயல்படவும் அவர் விரும்புகிறார். அவருடைய கொள்கைகள் நம்முடைய இருதயங்களில் பதிந்து நிலைத்திருக்க வேண்டும் என்று விரும்புகிறார்.

“கொள்கைகள்” அல்லது “கோட்பாடுகள் என்று நாம் பேசும் போது உண்மையில் அதற்கான அர்த்தம் என்னவாக இருக்கும்? ஆக்ஸ்போர்டு அகராதி அதை. “நம்முடைய நம்பிக்கைகளையும் நடைமுறைகளையும் வடிவமைத்து அவைகளின் தோற்றத்தின் அடிப்படையாக இருக்கும் உள்ளார்ந்த சத்தியம்” என்று வலியுறுத்துகிறது. அது, நீங்கள் ஒரு மனிதராய் யாராய் இருக்கிறீர்கள்? உங்களுடைய குணாதிசயத்தை எது ஆளுகை செய்கிறது? உங்களுடைய சிந்தனைகளை ஊக்குவிப்பது எது? உங்களுடைய நடவடிக்கைகளை உந்துகிறது எது? மற்றும், உங்களுடைய அடிப்படையான அமைப்பு என்னவாய் இருக்கிறது? என்பதே ஆகும். வேறு வார்த்தையில் சொல்வோமனால், உங்கள் ஆத்துமா எவ்வளவு ஆரோக்கியமாக இருக்கிறது? உங்கள் அத்துமா கிறிஸ்துவுடனான கோட்பாடுகளால் நிரப்பப்பட்டுள்ளாதா அல்லது உலகக் கோட்பாடுகளால் நிரப்பப்பட்டுள்ளதா? நீதிமொழிகள் 4:23 “ எல்லாக் காவலோடும் உன் இருதயத்தைக் காத்துக்கொள், அதினிடத்தினின்று ஜீவவூற்று புறப்படும்”. நாம் செய்கிற அனைத்தும் நம் இருத்தயத்தின் நிலையிலிருந்து அதன் விளைவாக வருகிறது. நாம் ஒரு நிமிடம் சற்று சிந்தித்துப் பார்ப்போம். கிறிஸ்தவர்களாகிய நாம் நம் இருதயத்தில் என்ன இருக்கிறது என்பதை அறிந்திருக்கிறோமா? நாம் யார் என்றும் தேவனுக்கு விரோதமான எந்த கொள்கைகளை நாம் கடைப்பிடித்துக் கொண்டிருக்கிறோம் என்றும் உண்மையாகவே பகுத்தறிந்து ஆராய்ந்து பார்க்கிறோமா? இதை நாம் சற்று சிந்தித்துப் பார்த்தால், நாம் நம்முடைய கிறிஸ்தவ வாழ்க்கையை மெய்யாகவே கிறிஸ்துவுக்குள் இல்லாமல் வாழ்ந்து கொண்டிருக்கிறோம் என்பதை உணர்ந்து கொள்வோம்.

நாம் இயேசுவைப் நோக்கி பார்க்கும்பொழுது தேவனுடைய கொள்கைகளும் கோட்பாடுகளும் செயல்முறையில் நடப்பிக்கப்பட்டதின் பூரணமான உதாரணத்தை காணலாம். அவர் தன்னலமற்றவராகவும், இரக்கமுள்ளவராகவும், வஞ்சகம் அல்லாதவராகவும், தாழ்மையானவராகவும், உண்மையானவராகவும் தைரியம் உள்ளவராகவும். நம்பத்தக்கவராயும் இருந்தார். சமுதாயத்தின் பொது கருத்துக்களும் சிந்தனைகளும் அவரின் நடக்கையை கட்டுப்படுத்தவில்லை. ஒரு இக்கட்டான சூழ்நிலையில் இருந்து தப்புவதற்காக மற்றவர்களை முகஸ்துதி செய்யவோ அல்லது சத்தியத்தை புரட்டவோ இல்லை அவருடைய பதில்கள் எப்பொழுதுமே ஆம் என்றும் இல்லை என்று மட்டுமே இருந்தன. அவர் தன் நிலைப்பாட்டில் உறுதியாக இருந்தும் அவர் அன்பாகவே இருந்தார். பிதாவின் சித்தத்திற்கு தன்னை முழுமையாக ஒப்புக் கொடுத்தவராய் இருந்து. அவர் இறுமாப்பை வெளியரங்கம் ஆக்கினார், பலவீனர்களை பாதுகாத்தார். நொறுங்குண்டவர்களை கட்டினார். அவர் தம்முடைய சீஷர்களை அவர்களுடைய பலவீனங்களின் மத்தியிலும் தாங்கினார். அவர் மற்றவர்களுக்காக தன்னையே அர்ப்பணித்திருந்தாலும் மற்றவர்கள் தன்னை தவறாக துஷ்பிரயோகம் செய்து கையாளுவதற்கு அனுமதிக்கவில்லை. தனக்கு சுகமான வாழ்க்கையை தக்க வைத்துக் கொள்வதற்காக இந்த உலகத்தில் அவர் வாழவில்லை. மேலும், நாம் பழைய ஏற்பாட்டை ஆராய்ந்து பார்த்தால் அதில் இருக்கும் அனைத்து நியாயப்பிரமாணங்களும் தேவனின் குணாதிசயத்தின் பிரதிபலிப்புகளாகவே இருக்கின்றன என்பதை நாம் காண முடியும். புதிய ஏற்ப்பாட்டிலும் இதே கருத்து தொடர்கிறது. அதாவது, சீஷர்களும் அப்போஸ்தலர்களும் கிறிஸ்துவின் கொள்கைகளின் அடிப்படையில் மட்டுமே வாழ்ந்து முடிவுகளை எடுத்தார்கள். அவருடைய குணாதிசயம் இல்லாமல் செயல்பட்ட எவரும் அவரால் நீக்கப்பட்டனர் அல்லது அவரால் சிட்ச்சிக்கப்பட்டார்கள். இதுவே ஆரம்பகால கிறிஸ்தவமும் திருச்சபையும் நிறுவப்பட்டதின் ஒரே அடிப்படையாகும்.

எனவே, இப்போது கேள்வி நம்மை நோக்கி கேட்கப்படுகிறது: நாம் இந்தக் கொள்கைகளின்படி வாழ்கிறோமா? நம்முடைய வார்த்தைகள், உறவுகள், முடிவுகள் மற்றும் மனப்பான்மைகள் அவரைப் பிரதிபலிக்கின்றதாய் இருக்கிறதா? இது எளிதான செயல்முறை அல்ல. நம்மை நாம் உள்நோக்கிப் பார்ப்பது வேதனையாக தான் இருக்கும். ஏனென்றால், நமக்குள்ளாக கிறிஸ்துவுடன் பொருந்தக்கூடாத சில குணாதிசயங்களை கண்டறிவோம். ஆனால், அங்குதான் நம்முடைய மறுரூபமாகப்படுதல் தொடங்குகிறது. எரேமியா 17:10 -ல் “கர்த்தராகிய நானே ஒவ்வொருவனுக்கும், அவனவன் வழிகளுக்கும் செய்கைகளின் பலன்களுக்கும் தக்கதைக் கொடுக்கும்படிக்கு, இருதயத்தை உள்ளிந்திரியங்களைச் ஆராய்கிறவரும் சோதித்தறிகிறவருமாயிருக்கிறன்.” நமக்குள் என்ன தவறு இருக்கிறது என்பதை நாம் உணர்ந்து அதனை அங்கீகரிக்கும் போது இறுதியில் நாம் அதிலிருந்து குணப்படுவதற்காக தேவனிடம் ஒப்புக்கொடுக்க முடியும். இது ஒரு யுத்தமாக தான் இருக்கும். ஆனால், இதில் போராடுவதற்கு தேவன் நமக்கு உதவி செய்வார். கலாத்தியர் 5:24,25 இப்படியாக நம்மை நினைவூட்டுகிறது. “24. கிறிஸ்துவினுடையவர்கள் தங்கள் மாம்சத்தையும் அதின் ஆசை இச்சைகளையும் சிலுவையில் அறைந்திருக்கிறார்கள். 25. நாம் ஆவியினாலே பிழைத்திருந்தால், ஆவிக்கேற்றபடி நடக்கவும்கடவோம்.”நாம் தேவனுடைய கொள்கைகளில் நம்மை உறுதிப்படுத்தும் போது சத்துரு தனது பலத்தை இழக்கிறான். ஏனென்றால், தேவனுடைய கொள்கைகள் எங்கு ஆளுகை செய்கின்றனவோ அங்கு அவருடைய பிரசன்னம் ஆளுகை செய்கிறது. நம்முடைய கொள்கைகளை நாம் சீர்படுத்தாமல் நம்முடைய சத்துருவுக்கு எதிராக போராடுவது அர்த்தமற்றது. ரோமர் 8:31 “இவைகளைக்குறித்து நாம் என்ன சொல்லுவோம்? தேவன் நம்முடைய பட்சத்திலிருந்தால் நமக்கு விரோதமாயிருப்பவன் யார்?” அவருடைய கொள்கைகள் நமக்குள் வாசம் செய்யும்போது அவர் நம்முடன் இருக்கிறார். ஆனால் நாம் அவருடைய குணாதிசயங்களை எதிர்க்கிறவர்களாய் இருந்தால் அவருடைய பிரசன்னத்தை எப்படி எதிர்பார்க்க முடியும்? கிறிஸ்துவைப் போல் வாழுவது நமக்கு ஒரு யதார்த்தமான இயல்பான வாழ்க்கையாக மாறும் வரைக்கும் நம்முடைய இருதயங்களை அவர் ஆராய்ந்து அறிவதற்கும், நம்முடைய சிந்தனைகளை சீர் அமைப்பதற்கும், அவருடைய கொள்கைகளையும் கோட்பாடுகளையும் நம்முடைய உள்ளான மனிதனுக்குள் எழுதும் படியாகவும் இன்று அவரை நாம் அழைப்போமாக.

இன்றைய சிந்தனைக்கு:

ஒரு கிறிஸ்தவராக, உங்களுடைய இயல்பான நடத்தை முறை என்னதாய் இருக்கிறது? உங்கள் சிந்தனையையும் நடத்தையையும் கட்டுப்படுத்தக்கூடியதாய் இருக்கும் அஸ்திபாரம் எது? எந்தக் கொள்கைகள் உங்களுடைய ஆத்துமாவை ஆளுகை செய்கின்றன? நீங்கள் எப்படிப்பட்ட குணாதிசயங்களை உடையவர்களாய் இருக்கிறீர்கள்? தேவனுடைய குணாதிசயத்துடன் உங்களுடைய குணாதிசயம் பொருத்தப்பட்டுள்ளதாய் இருக்கிறதா?

ஜெபம்:

பரலோகத்தில் இருக்கும் எங்கள் பிதாவே, நாங்கள் பெரும்பாலும் உம்முடைய குணாதிசயத்தை உடையவர்களாய் இல்லை. நீர் இந்த பூமியில் உதாரணமாய் வாழ்ந்து காட்டின உம்முடைய கொள்கைகளை குறித்து எந்த விழிப்புணர்வும் இல்லாமல் நாங்கள் இருக்கிறோம். நாங்கள் பெரும்பாலும் எங்களுடைய வாழ்க்கையை மேலோட்டமாக வாழ்ந்து எப்படியோ ஒரு வழியில் எங்களுடைய வாழ்க்கையில் கடந்து சென்றால் போதும் என்று வாழ்கிறோம். எங்கள் வாழ்க்கையின் ஒவ்வொரு சூழ்நிலையிலும் அல்லது சந்தர்ப்பத்திலும் உம்மைப் போல் செயல்படுகிறோமா என்று சற்று நின்று நாங்கள் சிந்திப்பதில்லை. உண்மையாகவே எது எங்களுடைய அஸ்திபாரமாய் இருக்கிறது என்பதை உணர்ந்து கொள்ள நீர் தந்த இந்த வாய்ப்புக்காக நன்றி சொல்லுகிறோம். எங்களுடைய இருதயத்தின் மேலும் ஒவ்வொரு சிந்தனை முறைகளுக்கு மேலும் உம்முடைய கொள்கைகள் மேலானதாய் ஆட்சி செய்து அவைகளை கட்டுப்படுத்துவதாக. உம்முடைய குணாதிசயமும் சாரம்சமும் எங்கள் ஆத்துமாவை ஆளுகை செய்வதாக. இதன் நிமித்தம் உம்முடைய சுபாவம் எங்களுக்குள் இருப்பதினால் நாங்கள் மற்றவர்களை நிலை நிறுத்துவோமாக. எங்கள் இராஜாதி இராஜாவாகிய இயேசு கிறிஸ்துவின் இணையற்ற நாமத்தில் இதைக் கேட்கிறோம் நல்ல பிதாவே ஆமென்.

இன்றைக்கு கற்றுக்கொள்ள வேண்டியது:

கிறிஸ்தவம் என்பது வெறும் ஜெபம் செய்வது, வேதாகமத்தை வாசிப்பது, சபைக்கு செல்லுவது, கிறிஸ்தவ பாடல்களை கேட்பது மற்றும் நற்செய்தியைப் பிரசங்கிப்பது மட்டுமல்ல. அது, அதை விட மிகவும் ஆழமானது. அது, நம்மை எது கட்டுப்படுத்துகிறது என்பதின் பிரதிபலிப்பாகும். கிறிஸ்துவின் சிந்தையானது நம்முடைய சிந்திக்கும் முறைகளை கட்டுப்படுத்துமானால் நம்முடைய வாழ்க்கையில் அவரோடு பொருந்தாத எல்லா காரியங்களையும் நாம் எளிதாக களைப்புடுங்க முடியும். நாம் அநேக நேரம் நம்முடைய பொருளாதாரம். உறவுகள், தொழில்கள், எதிர்காலம் போன்றவைகளில் தோல்வி அடைந்து இருக்கிறோம். ஏனென்றால், நம்முடைய கொள்கைகளையும் கோட்பாடுகளையும் சீர் பொருத்தாமல் இவைகளை அடைய நாம் முயற்சிக்கின்றோம். இது விதைகளை நட்டு, நீர்ப்பாசனம் செய்து. அதை வளர்த்து. பழத்தை உற்பத்தி செய்யாமல் பழங்களை விரும்புவது போன்றதாகும். நமது குணாதிசயத்தின் அஸ்திபாரம் சீரமைக்கப்பட்டு அவரில் நிலைநிறுத்தப்படாவிட்டால், நாம் கட்டுகிற எதுவும் பெரும் வெள்ளத்தில் நிலை நிற்காது பெரும்பாலும், கவலைக்கிடமாக, நாம் கட்டிடத்தில் கவனம் செலுத்தி அஸ்திபாரத்தை மறந்து விடுகிறோம். நீதிமொழிகள் 4:23 சொல்வது போல் நமது வாழ்க்கையில் வரும் பிரச்சனைகள் அனைத்தும் நம்முடைய இருதயத்தின் நிலைப்பாட்டின் விளைவாகும். நாம் விடுதலைக்காக ஜெபிக்கும்போது, தேவன் எப்போதுமே நம்முடைய குணாதிசய வளர்ச்சிக்கு ஏதுவாக பதிலளிப்பார். எனவே, கிறிஸ்தவ மனப்பான்மை என்பது பிரச்சனைகளைத் தீர்க்க பாடுபடுவதற்குப் பதிலாக  தன்னுடைய கொள்கைகளுக்காகவும்  நெறிமுறைகளுக்காகவும் அமைதியுடனும் விடாமுயற்சியுடனும் செயல்படுவதாகும்.

(2025 நவம்பர் மாதம் 3 அன்று மத்தேயு 11:28 ஊழியத்தின் சார்பாக சகோதரி ஜெஸிந்த் ஏஞ்சல் அவர்கள் எழுதிய தினசரி வேத தியானத்தின் பிரதிபலிப்பு சகோதரி லல்லியால் மொழிப்பெயர்க்ப்பட்டது).

அறிவிப்புகள்:

1. உங்களுடைய சீஷத்துவ பயணத்தில் நீங்கள் ஆதரவைத் தேடுகிறீர்கள் என்றால், ஒவ்வொரு சனிக்கிழமையும் காலை 6 மணிக்கு (இந்திய நேரப்படி) நடைபெறும் எங்களுடைய வாராந்திர சீஷத்துவ கூடுகையில் சேர உங்களை அன்புடன் அழைக்கிறோம்.

இணைப்பு:https://us06web.zoom.us/j/81144235750pwd=RG4veEdLQkJNSINXYWIZ WmNnb3EvQT09

(சந்திப்பு ஐடி: 811 4423 5750. கடவுச்சொல்: 12345).

2.  தனிப்பட்ட ஆலோசனை பெறுவதற்கு எங்களைத் தொடர்பு கொள்ளவும். உங்களுடன் விசுவாசத்திலும் மற்றும் ஐக்கியத்திலும் நடக்க நாங்கள் எதிர்நோக்குகிறோம்.

• எங்களுடைய ஊழியங்கள் மற்றும் கூடுகைகளை குறித்த அறிவிப்புகளுக்கும் மற்றும் தகவல் தொடர்புக்கும் எங்கள் வாட்ஸ்அப் குழுவில் சேரவும்:  https://chatwhatsapp.com/FQuH58GtkEEApPCm9gN8no
• நேரடி ஆலோசனை பெற்றுக்கொள்ள நீங்கள் விரும்பினால், கீழே உள்ள இணைப்பை உபயோகித்து ஏற்பாடு செய்யுங்கள். https://scheduler.zoom.us/rev-immanuel-paul-appointment

Click Here to Download as PDF -> Tamil